Nakarecord kahapon sang 27 ka bag-o nga kaso sang COVID-19 ang probinsya sang Negros Occidental samtang nadugangan naman sang 13 ang kaso sa ciudad sang Bacolod.

Nakadugang man sang 16 ka mga panibag-o nga kaso ang Iloilo City, 10 sa Iloilo Province samtang duwa naman ang nagdugang sa Capiz.

Sa kabug-usan, nagdangat na ang kaso sang COVID-19 sa Western Visayas sa 2,586 sa pagdugang sang 68 kahapon.

1,369 diri ang aktibo nga kaso, 1,183 ang recoveries sa pagdugang sang 19 samtang nagapabilin naman sa 24 ang nagtaliwan bangod sang virus.

Yara naman sa 89.26% sa record sang kaso sang rehiyon ang asymptomatic.

Samtamg nagpagwa naman sang pila ka adjustment ang Department of Health (DOH) Region 6 kahapon angot sa COVID-19 case bulletin records.

Ang case code nga WV 2456 ang ginhatag sa bag-o nga kumpirmado nga kaso nga nagikan sa Capiz, samtang ang daan naman nga kaso nga residente sa Concepcion, Iloilo Province ang nahibaluan nga nakarecord na sadto bilang WV 1094 sa case bulletin no. 123.

Gin-ilisan naman ang address ni WV 2447 humalin sa Oton, Iloilo nangin City Proper, Iloilo City na ini samtang si WV 2284 naman nga ang anay record ang nagikan sa Barotac Viejo ang gin-ilisan sang San Dionisio, Iloilo.

Si WV 2453 naman ang gin-ilisan ang kategorya sang kaso humalin sa local case, nangin locally stranded individual (LSI) ini.

Sa karun, ang kabug-usan nga kaso sang COVID-19 sa probinsya ang nagdangat na sa 752 samtang nagdangat naman sa 434 ang sa ciudad sang Bacolod.