Gin-anunsyar ni Negros Occidental Governor Eugenio Jose “Bong” Lacson nga magabaton ang probinsya sang 100,000 doses sang coronavirus vaccine para sa 50,000 ka mga indibidwal.

Sa interview sang Bombo Radyo kay Lacson, ginpahayag sini nga ang prayoridad sa mga pagahatagan sang bakuna amo ang mga medical frontliners nga napaidalum sa provincial government.

Suno sa iya, handa man ang mga ciudad nga magbakal sang bakuna kag ang probinsya na lang ang maga-order in behalf sa ila.

Suno sa iya, sa ginpatigayon nga zoom meeting sang League of Provincies kaupod si Vaccine Czar Sec. Carlito Galvez Jr., target sang national government nga 70% sang populasyon ang mabakunahan gani 30% nalang ang ipreparar sang probinsya.

Suno diri, nakacommit naman ang pungsod sa AstraZeneca apang wala pa nahibaluan kun san-o maabot.

Gindugang man sini nga kun ano ang una nga mangin available, amu mana ang ihatag sang national government.

Aminado man si Lacson nga medyo mahal ang balor sang bakuna apang ila ubrahon ang tanan agud mabakunahan ang tanan

Nagpahanumdum man ini sa mga pumuluyo nga indi mahapos ang pagprocure sang vaccine kag magalabay pa ini sa proseso gani nagalaom ini nga maintindihan sang tanan kun madugay ini nga mag-abot.