Nagbalik sa sabak sang gobyerno ang isa ka miyembro sang New People’s Army (NPA) sa syudad sang Guihulngan, Negros Oriental sang tinalikdan nga Martes.

Sa interview sang Bombo Radyo Bacolod kay 3rd Infantry Division spokesperson Army Major Cenon Pancito III, nagsungka sa gobyerno paagi sa cluster sang Guihulngan City Task Force-ELCAC ang rebelde nga ginkilala kay Juan Vergara ukon Ka Mel, miyembro sang Leonardo Panaligan Command Central Negros 1, Komiteng Rehiyon-Negros, Cebu, Bohol kag Siquijor (KR-NCBS).

Ang pagsungka sini ang ginfacilitate sang joint elements sang Philippine Army’s 62nd Infantry (Unifier) Battalion, Regional Mobile Force Battalion 7 kag Guihulngan City Police Station.

Suno kay Pancito, si Ka Mel ang nagdesisyon nga magsurender bangud luyag na sini nga makaupod ang pamilya.

Ginsurrender man sini ang isa ka M16 rifle kag isa ka long magazine loaded sang 29 rounds sang live ammunition.

Ginpahayag man ni Cenon nga suno kay Ka Mel ginsurrender sini ang armas bangud luyag sini nga mapamatud-an nga seryoso ini sa iya nga pagsungka kag luyag na sini nga magpangabuhi sang normal kag kaupod ang iya pamilya.

Nakita man sang army nga naga-amat amat man nareyalisar sang mga miyembro sang NPA nga wala sang kamatuoran ang ginpromisa sang mga lider nila kasunod sang sunod sunod nga pagsungka sang ila miyembro.