Apat na ang napatay sa mga miyembro sang Epogon Robbery Group nga ginaalegar naga-operate sa bilog nga probinsya sang Negros Occidental.

Sa archives sang Bombo Radyo Bacolod, patay ang 22-anyos nga si Eddie Epogon matapos ginaalegar nagbato sa mga otoridad nga nagserbe sang warrant of arrest sa iya sa Sitio Manluy-a, San Jose, Sipalay City nagligad nga Pebrero 20, alas-3:00 sang kaagahon.

Sa interview sang Bombo Radyo Bacolod kay P/Major James Latayon, hepe sang Sipalay City Police Station, si Epogon ang may warrant of arrest sa kaso nga robbery with homicide kag paghupot sang mga iligal nga armas kag granada.

Sang nahibaluan sang suspetsado suno sa hepe ang presensya sang mga otoridad, ginpagwa sini sa ila nga balay ang iya nga asawa kag iloy kag nagpalupok rason nga nagbalos ang mga operatiba.

Sang Pebrero 22 sang gab-i, patay ang tiyo ni Eddie nga si Eduardo Cataraja matapos gintiro sa sulod mismo sang ila nga balay sa Purok Linya, Barangay Cabug, Bacolod City.

Si Cataraja ang utod sang iloy ni Eddie.

Sang sini lang nga Huwebes sang gab-i, patay man ang ginaalegar miyembro sang grupo nga si Jose Estaniel matapos gintiro sa gwa sang ila nga balay sa Purok Saturn, Barangay Handumanan, Bacolod City.

Si Estaniel ang nagasaulog sang iya 55th birthday kag bunyag sang iya anak sang siya ang gintiro sang apat ka mga suspetsado nga nagsakay sa pula nga salakyan sa ila nga pagpalagyo.

Kag ang pinakaulihi amo si Arnold Rivera nga ginpatay sa Hacienda Malinao, Barangay E. Lopez, Silay City kagab-i.

Ang lider naman sang grupo nga si Francisco Dela Cruz Epogon, 30 anyos, residente sang Sitio Manluy-a, Brgy. San Jose, Sipalay City ang nadakpan sa Sitio Patic, Purok 2, Brgy. Isio, Cauayan sang June 21, 2020.

Suno sa hepe sang Cauayan Municipal Police Station nga si Police Major Lowell Garinganao, si Francisco Epogon ang ginsaylo na sa detention facility sang Bureau of Jail Management and Penology matapos nga maaresto sa Barangay Isio.

Sang tinalikdan nga bulan, ginpahayag man sang Bacolod Police Station 4 nga ginapangita pa ang duha ka miyembro sang grupo nga si Ariel Rivera kag Ronnie Epogon.