Bangud sa baisay angot sa kapaslawan sang bana nga ipakay-o ang ila balay samtang nagatrabaho sa malayo ang iya misis, ginpatay sang mister ang iya asawa sa atubang mismo sang ila nga mga kabataan sa banwa sang Cauayan diri sa Negros Occidental kahapon.

Sa interview sang Bombo Radyo Bacolod kay Police Staff Sergeant Cyrus Maquiling, imbestigador sang Cauayan Municipal Police Station, duha na ka tuig nga nagatrabaho sa Manila ang 50-anyos nga si Presila Mendiona kag nagpauli ini sa ila puluy-an sa Purok 1, Barangay Yao-yao sang Disyembre 19 agud magproseso para sa national ID.

Apang nakibot ini nga wala napakaayo ang ila balay kag halos indi na matulugan apisar masami ini nagapadala sang kwarta sa iya bana nga si Eduardo.

Bangud sini, nagbaisay ang mag-asawa tubtub gingutrab sang mister ang liog sang iya misis gamit ang flaminco sa atubang sang duha nila ka kabataan nga lunsay menor de edad.

May pilas man ang misis sa iya nawala nga kamot kag ginalantaw nga ginsagang pa niya ang flaminco.

Nakadalagan pa man ang biktima sang kapin 200 metros kag nakapangayo sang bulig sa barangay apang sang gindala ini sa hospital, gindeklarar ini nga dead on arrival.

Suno kay Maquiling, antes magpa-Manila ang biktima agud didto magtrabaho, masami man ini ginasakit sang iya bana.

Sa karun, padayon pa nga ginapangita sang Cauayan Police kag katapo sang 79th Infantry Batallion sang Philippine Army ang suspetsado matapos nagpalagyo.

Nagpanawagan man si Maquiling sa tanan nga nakakilala kag residente sa nasambit nga banwa nga makig-angot sa police kun may yara sang impormasyon angot sa suspetsado.