Nagahingyo ang medical technologist in charge sa bloodletting activity sang Murcia Municipal Health Office sa mga pumuluyo nga magpakigbahin sa bloodletting program nga patigayunon subong nga adlaw sa Brgy. Alegria, banwa sang Murcia, Negros Occidental in partnership sa Bombo Radyo para sa Dugong Bombo.

Sa interview sang Bombo Radyo kay Allan Benjamin, 100% na sila nga preparado para sa nasambit nga aktibidad.

Suno sa iya, kada tuig, nagapatigayon gid sila sang bloodletting schedule sa nagkalain-lain nga barangay sa banwa kada bulan.

Aminado man si Benjamin nga dillema sa karun sa tanan nga mga ciudad kag munisipalidad ang kakulang sang supply sang dugo samtang nagadako naman ang demand sini.

Suno diri, ang Negros Occidental ang numero uno nga nagakinahanglan sang madamo nga pondo sang dugo bangud nagapanguna ang probinsya sa may pinakamadamo nga dialysis patient sa bilog nga Pilipinas.

Ginkumbinsi man sini ang mga benepisyaryo sang Pantawid Pamilyang Pilipino Program (4Ps) nga magdonar sang dugo bangud ginahatagan sila sang assistance sang gobyerno gani kuntani ibalik man nila ang bulig paagi sa pagpartisipar sa programa.

Ang bloodletting program subong nga adlaw ang magasugod alas 8:00 sang aga.

Suno sa medical technologist, ang mga luyag magdonar ang dapat nagabug-at sang 50 kilos pasaka, nagaedad 18 tubtob 65 anyos apang kun menor-de-edad kinahanglan ang parent’s consent, wala nakainom sang alcohol kag antibiotics, wala nagpulaw ukon nakatulog sang anum tubtob walo ka oras, kag wala nagasuprer sang hilanat, ubo, trangkaso ukon sip-on.

Nagapasalamat man ini sa Bombo Radyo bangud paagi diri, mapalayag sa mga tawo ang programa nga nagaluwas sa kabuhi sang isig-kapareho.

Suno kay Benjamin, ang ini nga adbokasiya ang indi lang iya sang mga medical practitioners kundi iya sang tanan bangud indi ini masarangan kun wala ang kooperasyon sang mga pumuluyo.

Handa naman ang Philippine Red Cross para sa bloodletting activity.

Sa interview sang Bombo Radyo kay Eloisa Marie Liza, donor recruitment officer sang Red Cross Bacolod City-Negros Occidental Chapter, sa Setyembre 26 magapatigayon man sang blood letting, alas 08:00 sang aga, sa Barangay Nanca banwa sang EB Magalona, Negros Occidental.

Suno kay Liza, wala man sang dapat kahangaw-an ang mga luyag magdonar bangud magasuksok man sang personal protective equipment (PPE) ang mga medical workers kag hugot nga ipatuman ang health protocols.

Suno sa iya, masami sila nga ginakulang bangud nagasupply man sila sa mga ospital nga nagakinahanglan.

Gani nagapanawagan ini sa mga pumuluyo nga kun maayo man lang ang lawas, wala sang travel history kag ginakabig nga “fit”, magdonar na sang dugo agud makabulig man salbar sang kabuhi.