-- ADVERTISEMENT --

Ginpahibalo sang director sang Commission on Liturgy sang Diocese of Bacolod ang adjustments sa pagpatigayon sang Misa de Aguinaldo ukon Simbang Gabi karun nga yara gihapon ang pagpamahog sang COVID-19 pandemic.

Suno kay Fr. Henry Donasco, antes paman magluntad ang COVID-19 pandemic ang pagpatigayon sang misa para sa Simbang Gabi ang ginahiwat alas-4:00 tubtob alas-6:00 sang aga.

Apang subong nga Desyembre 16 tubtob 24, ginpahanugutan ni Bishop Patricio Buzon sang Diocese of Bacolod nga mapatigayon sa duha ka schedule ang Misa de Aguinaldo sa San Sebastian Cathedral.

Ini ang patigayunon alas-3:30 kag alas-5:00 sang aga.

Sa pihak nga bahin, ang iban naman nga mga simbahan sa syudad ang ginpahanugutan sang pagpatigayon sang misa sa kaangay nga oras kun aga apang isa lang ka beses, kag mahimo man makapatigayon sang Misa de Aguinaldo sa gab-i sumugod sa Desyembre 15 tubtob 23.

-- ADVERTISEMENT --

Ang misa kun gab-i ang mahimo lang humalin alas-6:00 tubtob alas-8:00 sang gab-i kag wala na ginapahanugutan nga maglapaw sa oras.

Paathag sini nga sa cathedral wala na sang misa sa gab-i bangod duha na ang misa nga patigayunon kun aga.

Nagahingyo man sang bulig si Fr. Donasco sa mga kapulisan kag Bureau of Fire Protection (BFP) nga magdeploy sang mga personnel sa simbahan sa pagpatigayon sang Simbang Gabi agud nga makontrolar ang publiko kag maseguro ang social distancing ilabi na sa mga yara sa gwa sang simbahan.

Pahayag sang pari nga bisan yara na sa alert level 2 ang syudad sang Bacolod, dapat gihapon maseguro nga masunod ang basic health protocols ilabi na sa mga minors nga indi pa mahimo mabakunahan.

Ginapanugyan man ni Fr. Donasco sa mga ginikanan nga indi nalang pagdal-on sa simbahan ang mga lapsag kag toddlers kag kun mahimo ibilin nalang ang mga ini sa panimalay.