-- ADVERTISEMENT --

Nalapawan sang Bacolod City ang target ukon ang quota nga ginhatag sang national government sa una nga adlaw sang National Vaccination Days matapos nagdangat sa 29,047 ang kabug-usan nga nabakunahan.

Sa interview sang Bombo Radyo kay Emergency Operations Center Executive Director Em Ang, ginakalipay sini ang nangin resulta sang vaccination kahapon bangud nalapawan ang 22,000 nga target sang Department of Health.

Suno kay Ang, magluwas sa 41 ka mga vaccination centers, may mga purok outreach man nga ginpatigayon sa mga purok sa Barangay Handumanan kag Taculing.

Aminado ini nga isa sa mga pagpanghangkat amu ang pagmanage sang mga madamo nga mga tawo subong man ang kakulang sa manpower kun sa diin iban sa mga vaccinators ang alas 3:00 na nakapanyaga.

Kahapon, may ginhamtang nga vaccination center sa Purok Cabugwason, Barangay Mansilingan kag suno kay Ang, sa masunod nga mga inadlaw, sa lain naman nga barangay bangud indi sila madungan bangud madutay lamang ang volunteers, doctors kag midwives.

-- ADVERTISEMENT --

Nagpanawagan man ini sa mga wala pa nakapabakuna nga kuhaon na ang ini nga oportunidad nga makapatublok samtang madamo pa ang supply.