Nagpangayo sang duha ka semana nga plaso ang lima ka mga departamento sa Bacolod City agud maplastar kag ma-eksplekar ang liquidation kag status sang P119 million nga pondo sang ciudad nagikan sa Bayanihan Fund nga gindownload sa Bacolod tatlo ka bulan na ang nakaligad.

Sa virtual session nga ginpatigayon sang Sangguniang Panlungsod kahapon, ginpahayag ni Councilor Dindo Ramos nga naghingyo sang duha ka semana ang City Accountant, City Treasurer, City Budget Officer, City Legal Office kag Bids and Awards Committee agud maplastar ang liquidation sang nasambit nga pondo bangud ang pagpreparar sini ang nagakinahanglan sang nagakaigo nga tion.

Suno kay Ramos, willing kag available man ang mga natungdan nga magpresentar sang ginapangayo nga report sa session sang SP sa masunod nga duha ka semana.

Nahisugtan man santo sa rekomendasyon ni Councilor Al Victor Espino nga mahatagan ang mga konsehal sang hardcopies prior sa petsa kun san-o sila mareport sa session agud makaformulate na nga daan ang mga konsehal sang mga pamangkot ukon klaripikasyon.

Ginpahayag man ni Councilor Cindy Rojas, chairman sang Committee on Appropriation and Finance nga kun ano ang desisyun nga mahisugtan sang committee, magasunod lang sila.

Sa katapusan sang session, nahisugtan nga ipatawag na lang isa-isa ang mga department heads nga mag-appearance sa session agud iplastar kun diin nagkadto, kun may ginkadtuan ukon wala pa magamit ang P119 million nga pondo sang ciudad.