Patay ang isa ka menor de edad matapos nga malumos sa Malisbog river sa Sitio Riverside, Barangay Hawaiian, Silay City, Negros Occidental.

Suno kay Alexander Muñoz, pinuno sa City Disaster Risk Reduction Management Office (CDRRMO) sa Silay City, natukiban sini nga naghagaday nga magpaligo ang duha ka menor de edad nga mag-abyan nga sanday Perales kag Abelar sa Malisbog River.

Ang duha ka menor de edad ang lunsay mga residente man sa Sitio Riverside, Barangay Hawaiian, Silay City.

Santo sa imbestigasyon kag mga rescuers, may manabaw kag madalum nga bahin ang suba.

Ginalantaw nga wala gina-ekspektar sang mga kabataan nga indi palarehas ang kadalumon sang suba nga ginlumpatan.

Pahayag ni Muñoz nga natukiban nila nga sagad maglangoy Perales apang naalang-alang ini matapos nga ginsalbar ang abyan nga si Abelar nga amo kuntani ang malumos.

Matapos nga maglugdang si Perales gilayon naman nga nagpangayo sang bulig si Abelar.

Suno kay Muñoz, nabatun nila ang report takna alas-2:30 sang hapon kag ginabanta takna alas-2:00 sang hapon nagluntad ang pagkalunod.

Nabudlayan naman ang mga ini bangod sa kadalumon sang suba gani nagpangayo sila sang bulig sa Philippine Coast Guard bangod may ara ang mga ini sang nagakaigo nga kagamitan sa rescue operation sa mga madalum nga tubig kaangay sa baybay kag suba.

Nasapwan ang lawas ni Perales nga wala na sang kabuhi sa mismo nga bahin sang suba kun sa diin ini naglugdang takna alas-6:00 sang gab-i, matapos ang kapin apat ka oras nga search and rescue operation.