Ginkumpirmar sang executive director sang Emergency Operations Center sa ciudad sang Bacolod nga ginmanduan na ni Mayor Evelio “Bing” Leonardia ang City Legal Office agud nga maghimo sang nagakaigo nga tikang batok sa Transcom Company para mahibaluan kun may salabton sila kasunod sang pagpositibo sang 41 ka mga empleyado.

Nahibaluan nga una nagpositibo sa COVID-19 ang isa ka 21 anyos nga lalaki nga empleyado nga residente sang Barangay Bata, Bacolod City sadtong Enero 23.

Matapos ang contact tracing, duha pa ka mga empleyado ang nagpositibo man sa kaangay nga adlaw.

Sang Enero 25 kag Enero 26, nakarekord sang tag-isa ka mga positibo nga kaso; nadugangan ini sang duha sang Enero 27; kag pito naman sang Enero 29.

Bangud diri, nagpatigayon sang surveillance test sa kapin 594 ka mga empleyado sa nasambit nga kompaniya sang Enero 29 kag 30.

Sa nasambit nga numero, 27 diri ang nagpositibo gani nagdangat sa 41 ang kabug-usan nga kaso.

Sa interview sang Bombo Radyo Bacolod kay City Administrator Em Ang, ginpahayag sini nga ila paimbestigaran kun may nalapas nga protocol ang kompaniya rason nga naglapta ang virus.

Suno kay Ang, wala naga-obserbar sang physical distancing ang mga empleyado, may yara man sang ilimnan malapit sa opisina kag may kabudlayan sila sa contact tracing bangud nga wala sila nagagamit sang Bactrac.

Dugang pa sini nga kabay pa ma-edukar ang iban nga mga establisyemento sa natabo bangud indi nila luyag nga masayang lang ang ginpangabudlayan sa pila ka bulan kag mabalik ang quarantine status sang ciudad sa general community quarantine ukon modified enhanced community quarantine.

Sa karon, nagapadayon ang monitoring sang ciudad kag ila ginalibot ang mga BPO companies bangud diri ang madamo sang empleyado.