Masobra duha ka kilo sang shabu nga nagabalor malapit P14 million ang nakumpiskar sa buybust operation nga ginpatigayon sang San Carlos City Police Station, Regional Intelligence Division 6 kag Philippine Drug Enforcement Agency 6 sa 2nd Street, St. Vincent Subdivision, Brgy. 1, San Carlos City, alas 2:45 kahapon sang hapon.

photo from San Carlos City Police Station

Sa interview sang Bombo Radyo kay Police Major Mark Angelo Junco, hepe sang San Carlos City Police Station, may yara sila sang nabaton nga report sang Setyembre 20 nga may buybust operation nga ginpatigayon sa banwa ang Sibulan, Negros Oriental kun sa diin napatay si Joemarie Yongco, 26 anyos, matapos ginaalegar nagbato sa kapulisan sang makuhaan sang duha ka kilo nga shabu nga may balor nga P13.8 million.

Pagkahapon sa kaangay nga adlaw suno kay Junco, nakabaton man sila sang report nga may pito naman ka kilo sang shabu nga naintercept sa Cebu City kag ginaalegar nagikan sa San Carlos City.

Suno sa iya, very alarming ang sitwasyon gani nagpatawag ini sang pagsinapol sa iya mga personnel agud ivalidate ang balita kag kahapon, natigayon ang isa pa gid ka buybust operation sa bulig sa RID6 kag PDEA6.

Nadakpan si Emmanuel Siaboc alyas Eman, 31 anyos, residente sang Burgos Street, Brgy. 6, San Carlos City kag isa ka high value target samtang at large naman si William Allones alyas Bebe, isa man ka high value target kag karelasyon sang napatay nga si Joemarie Yongco.

Suno sa hepe, nakumpiskar ang 2.050 kilograms sang shabu lakip na ang buybust item kag P200,000 nga buybust money lakip na ang P100,000 nga budol money kag P500 nga subscribe money.

Ang nakumpiskar nga illegal nga druga ang may DDB value nga P13,940,000.

Sa karun, ginaimbestigaran pa sang kapulisan kun diin naghalin ang mga nakumpiskar nga shabu samtang yara naman sa kustodiya sang San Carlos City Police Station si Siaboc.