Masobra 100 mil pesos nga balor sang suspected shabu ang nakuha sa paghinakop sang isa ka lalaki nga nadakpan sa ginpatigayon nga drug buybust operation sang City Drug Enforcement Unit (CDEU) sang Bacolod City Police Office sa Arnaldo St. Purok Kahirop Village, Brgy. Singcang-Airport kaina sang aga.

Sa interview sang Bombo Radyo Bacolod sa Team Leader sang CDEU, ang suspetsado ang ginkilala kay Mark Larry Bayoneta, 36 anyos kag residente sang Boulevard St. Barangay Mambulac, Silay City.

Nakuha sa paghinakop sini ang 15 ka sachets sang suspected shabu, ginabanta nagabug-at sang 15 grams kag nagabalor sang P102,000.

Suno sa team leader, nakaagi na priso ang suspetsado bangud man sa kaso sa illegal nga druga apang naka-avail sang plea bargaining sang August 30, 2020 apang liwat nga nagbalik sa pagbaligya sang ginadumilian nga druga.

Nalakip na sa High Value Individual ang suspetsado.

Yara na sa paghinakop sang CDEU ang suspetsado kag natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002.