-- ADVERTISEMENT --

Ginadihon na sang Negros Occidental Provincial Government ang pagbukas sang Mambukal Resorts para sa mga fully vaccinated individuals sa Desyembre.

Suno kay Negros Occidental Provincial Administrator Atty Rayfrando Diaz, ini ang kabahin man sa tinutuyo sang probinsya nga mapanugyan ang pagpabakuna kag ang lokal nga turismo.

Madumduman nga ang Mambukal Mountain Resort ang halos duha man ka tuig nga nangin quarantine facility sa mga Provincial Government Employee nga natapikan sang COVID-19 kasubong man sang ila mga pamilya.

Sa karun wala na sang nakaquarantine sa lugar kadungan sa pagnubo sang kaso sang balatian sa probinsya.

Kadungan sa paggamit bilang quarantine facility, padayun man ang pagmintinar sa lugar.

-- ADVERTISEMENT --

Ang Mambukal Resorts and Sanctuary ang pagabuksan nga wala lang nagafocus sa kalipayan sang mga turista kasubong man nga gindidekar sa wildlife conservation.

Paathag ni Diaz nga sa pagbukas sang resort, indi na pagpahanugutan nga makasulod ang mga salakyan, samtang pagadumilian naman ang pagpanutod.

Ginatun-an na sang mga ini nga mahimo idumili na ang pagluto sa sulod sang resort.

Suno kay Diaz, tuman ka sensitibo ang mga flying fox nga mga paniki nga nagapuyo sa kalasangan sang Mambukal Resorts and Sanctuary, kun sa diin nagapalagyo ang mga ini kun may makita nga aso apat ka kilometros ang kalayuon sa ila.

Paathag sang Provincial Administrator nga luyag nila nga mag-enjoy ang mga pumuluyo apang indi man gusto sang probinsya nga mahalitan ang dunang manggad kag mga kasapatan.