Gindala na sa isa ka institution ang isa ka lapsag nga ginbilin sang ginapatihan nkatapo sang New People’s Army (NPA) sa sibilyan nga ila gintiniran sa Hacienda Ambulong, Barangay San Fernando, Talisay City kahapon.

Sa interview sang Dionela Madrona, pinuno sang Talisay City Social Welfare and Development Office (CSWDO), yara na sa isa ka social institution ang lapsag nga lalaki agud mahatagan sang nagakaigo nga pagtatap matapos nga ginturn over sang otoridad santo man sa Standard Operating Procedure (SOP) sang police kag armed forces sa tion nga may makuha nga lapsag.

Suno kay Madrona, wala sang kapasidad ang CSWDO nga magtatap sa bata gani gintugyan nila ini sa isa ka institution nga nagacater sang mga lapsag kag sa mga children under arm conflict.

Maayo man suno sa iya bangud ginbilin man ang mga gamit sini antes ginturn-over sang tag-iya sang balay sa katapo sang 79th IB sang Philippine Army.

Suno kay Madrona, may yara sang medical check-up nga ginpatigayon sa bata kag wala man sang problema bangud maayo ang iya nga sitwasyon.

Nagcoordinate naman ang Talisay City CSWDO sa isa ka Local Social Welfare Office agud pangitaon ang pamilya sang bata, santo man sa nakasaad sa birth certificate nga naapid sa mga gamit sini.

Ang bata ang ginbun-ag sang wala makasal nga iloy kag ang bata ang nakapangalan gamit ang apelyido sang iloy.

Wala naman sini ginbuyagyag ang pangalan sang bata para man sa seguridad.

Mahimo man nga makuha sang utod sang iloy sang lapsag ang bata apang kinahanglan magpakita ini sang dokumento nga nagapamatuod nga related sa bata.

May yara naman sang na-trace nga mahimo kadugo sang bata apang ginavalidate pa sa karun bangud lain ang barangay nga ginapuy-an sini.

Suno kay Madrona, kun makatapos na sila validate kag maturn-over na ang bata sa pamilya, igainform man nila ang Philippine Army nga naturnover na ini.

Nagpanugyan man ini sa publiko nga bisan ano pa ang ginapatihan nga ideyolohiya, dapat siguruhon ang seguridad sang mga kabataan kasubong man ang mga nagabusong kag napatiti nga mga iloy.