-- ADVERTISEMENT --

Kapin 500 ka puno sang marijuana ang natukiban sa isa ka plantasyon sa nabukid nga bahin sa Purok Mangium, Brgy Codcod, San Carlos City sa operasyon nga ginpatigayon sang Regional Police Drug Enforcement Unit 6 sang Lunes.

Sa interview sang Bombo Radyo kay PRO6 Spokesperson Lt. Col. Arnel Solis, may nabaton nga impormasyon ang ila drug enforcement unit nga may yara sang plantasyon sang marijuana sa nasambit nga lugar gani ila ini gilayon nga ginhimuan sang tikang.

Suno kay Solis, nagdangat sa anum ka oras antes nila nalab-ot ang lugar kag alas 11:00 sang aga, didto natukiban ang 200 square meters nga area kun sa diin may 300 ka mga magagmay nga tanum sang marijuana kag 200 ka mga puno ukon fully growned marijuana.

Santo sa assessment sang kapulisan, wala sang may nagapanag-iya sang duta kag posible nga ini ang ginapanag-iyahan sang gobyerno.

Ginabanta 10 kilos ang kabug-aton sang ila mga nakumpiskar nga may estimated market value nga P38,000.

-- ADVERTISEMENT --

Sa karun ila pa gina-imbestigahan kun sin-o ang nagtanom sang marijuanan sa lugar.

Nagpanugyan si Solis sa mga pumuluyo nga kun may impormasyon sila sa kun sin-o ang nagapanag-iya sang mga tanom, indi magduha-duha nga ipahibalo ini sa ila.

Ginpanginbulahan man sini ang mga kapulisan nga nangin madinalag-on nga operasyon kag suno sa iya, ini ang nagapakita lamang sang dedikasyon kag commitment sang kapulisan.