Nakasugilanon na si Nanay Armida Depositar Sobico-Quiocson sang Cauayan, Negros Occidental sa isa sa mga utod sini nga gintaban sang amay 60 ka tuig na ang nakaligad.

photo by Bombo News Team

Madumduman nga nagpanawagan sa Kahapon Lamang si Nanay Armida, 63 anyos kag residente sa Purok 3, Poblacion, Cauayan sadtong Setyembre 16 sa iya apat ka mga magulang nga sanday Lolita Depositar Sobico; Alarico Sobico Jr.; Alicia Sobico; kag Angelita Sobico nga wala makaupod sang malawig nga tinion sumugod sang ginkawat sang amay.

Nagpadulong ang amay sini sa Manila kag ginpanghatag man ang mga kabataan.

Samtang si Nanay Armida naman ang nabilin sa iloy nga si Maxima Depositar.

Matapos naman sang pagpanawagan, gilayon naman nga nakontak ini sang utod sa ikaduha nga pamilya sang amay nga si Alarico Sobico.

Ginhatag naman sini ang numero sang magulang ni Nanay Armida nga si Angelita Sobico.

Suno kay Nanay Armida, nagalain pa ang buot sini sang una nga magtawag sa utod bangod sa sya pa nga kamanghuran amo ang nagpangita sang paagi agud nga makontak ang magulang.

Duha nalang sa mga magulang sini ang nabilin nga buhi kag ini sanday Angelita kag Alicia samtang nauna naman nga nagtaliwan sanday Lolita kag Alarico.

Si Angelita, 65 anyos, ang yara sa karun nagapuyo sa Marikina City kag yara naman sa Pampanga 66 anyos nga magulang nga si Alicia.

Nagpahayag si Angelita nga luyag naman sini nga makita ang manghod apang indi pa makakadto sa Manila bangod wala sang byahe tuga sang pandemic.

Suno sa magulang, pirme sini nagakadumduman ang manghod kag indi makalipatan ang pangalan sini nga “Meding” apang wala ini makahibalo kun sa diin masugod.

Wala ini makahibalo sang ginhalinan nga lugar bangod lima ka tuig pa lang ini sang gintaban sang amay.

Dugang pa sini nga indi kuntani ini mag-upod sa amay sadto apang ginkungkong ini sang magulang gani wala na sang nahimo.

Suno diri, gindala sila sang amay sa Quezon City kag ginhatag ini sa mag-asawa nga wala sang bata.

Maayo naman ang nangin trato diri sang una apang nagbag-o kag wala na ini ginpalangga sang nagka-anak ang mag-asawa.

Naglayas naman ini sang naga-edad 15 anyos kag temprano nga nakapamana.

Sa programa nga Kahapon Lamang, eksklusibo nga nagbayluhanay sang “I love you” ang mag-utod sa isa kag isa.

Pahayag ni Angelita nga tuman ang kalipay sini bangod dugay na sini luyag nga makita ang manghod kag ang iloy.