-- ADVERTISEMENT --

Gin-athag sang Land Transportation Office (LTO) nga suspendido sa gihapon ang “mandatory inspection” sang motor vehicles kag private motor vehicle inspection centers (PMVICs), nga nauna na nga ginmando sang Department of Transportation (DOTr).

Nahibaluan nga ginpahayag ni LTO chief Edgar Galvante nga wala man ginpauntat ang operasyon sang PMVICs gani mahimo sa gihapon magpadulong ang mga tag-iya sang mga salakyan agud ipatsekyar ang ila nga salakyan para sa roadworthiness kag pagsunod sa Clean Air Act.

Mahimo man nga magpadulong ang mga tag-iya sang salakyan sa mga private emission testing center (PETC) nga may kalakip nga LTO visual inspection.

Ginhimo ni Galvante ang pag-athag bilang sabat sa pahayag ni Senador Grace Poe kaangot sa nabaton nga impormasyona nga may yara sang PMVIC sa pila ka mga probinsya nga nagapatuman sang “mandatory motor vehicle inspections” sa pihak sang mando sang DOTr nga suspendihon ang nasambit nga sahi sang pag-inspeksyon sa mga salakyan.

Suno kay Galvante, mahimo nga nagsala lamang ang pila ka mga motorista kaangot sa ginlunsyar sang LTO nga bag-o nga information technology (IT) system nga naangot sa PMVIC sa mga talalatapan sang LTO.

-- ADVERTISEMENT --

Tinutuyo sini nga magamit sang husto ang Motor Vehicle Inspection and Registration System (MVIRS), bilang re-imposition sang mandatory vehicle inspections sa PMVICs.

Dugang pa sang LTO chief nga tinutuyo man sang bag-o nga IT systems nga Land Transportation Management System (LTMS), nga makakuha sang nagakaigo nga datos kaangot sa roadworthiness status kag safety sang mga salakyan sa pungsod.

Ginmando man ni Transportation Secretary Tugade ang pagsuspendi sang mandatory inspection kag testing sang mga salakyan sa PMVIC samtang nagapatigayon pa sang pagtuon sa nasambit nga proseso nga kabahin sang pagparehistro sang mga salakyan.