-- ADVERTISEMENT --

Ginpakigbahin sang Bise Gobernador sa Negros Occidental nga ini ang nagtugyan kay late EB Magalona Mayor kag 3rd District Board Member David Albert Lacson nga magpa-ospital matapos ini nga mag-ako nga nagpositibo sa rapid test.

Suno kay Vice Governor Jeffrey Ferrer, nakilala sini nga dedikado sa trabaho bilang isa ka public servant si late Mayor Lacson.

Dugang pa sang bise gobernador nga daw utod na ang pagkabig sini kay Lacson kag indi lang basta abyan.

Gani nagalain man ang buot sini sang mahibaluan nga nagtaliwan na ang abyan kapin alas-6:00 sang gab-i sang Biyernes.

bombo file photo

Suno kay Ferrer, sa General Assembly sang ila partido nga United Negros Alliance (UNEGA) kahapon, ginkonsiderar man nga isa sa mga pillars sang partido si late Mayor David Lacson.

-- ADVERTISEMENT --

Pahayag sang bise gobernador nga nakasugilanon pa sini si Lacson sang Nobyembre 30 kun sa diin ini ang nagpahibalo nga nagpositibo sa rapid test.

Bangod sini nagtugyan man gilayon si Ferrer nga magpa-ospital ini apisar nga maayo lang ini kun tulukon.

Ini bangod nagapati si Ferrer nga tanan nga may ginabatyag nga trangkaso ang mahimo magpositibo kun magpaidalum sa rapid test gani agud nga masegurado, gintugyan sini nga magpa-ospital.

Nahibaluan nalang sang bise gobernador nga nagpa-ospital si Lacson sang Desyembre 1, kag nabalitaan nalang nga ini ang nagtaliwan sang Biyernes sa edad nga 46 anyos.

Suno kay Ferrer, si Lacson ang sadto paman may gina-atubang na nga problema sa atay kun sa din mataas ang SGPT, creatinine kag cholesterol ni Lacson kun sa diin makita man nga overweight na ang anay alkalde.

Aminado naman ini nga tanan nga kabuhi ang may katapusan gani ginapangamuyuan nalang sini ang kalag ni late Mayor Lacson.

Mensahe man sini sa asawa kag mga kabataan sang anay alkalde nga nagabuylog ang mga ini sa kalisod sang nabilin nga pamilya.