Patay ang lalaki nga manugremit kuntani sang taya sa STL matapos gintiro sang ginaalegar riding-in-tandem suspects samtang nagamaneho sang tricycle sa Bangga Tomaro, Brgy Sum-ag Bacolod City kagab-i.

Sa interview sang Bombo Radyo kay Police Lt. Gilbert Batiles, station commander sang Bacolod City Police Station 9, ang biktima nga si Gaudisio Empase, 53 anyos kag nagapuyo sa SP Village, Brgy. Pahanocoy, Bacolod City ang nagamaneho sang iya man kaugalingon sa tricycle sang ini ang gintiro sang mga suspetsado antes ang alas-10:00 sang gab-i.

Bangud sa madamo nga igo sang bala sa lawas, gilayon nga ginbawian sang kabuhi si Empase.

Suno kay Batiles, ginabanta lima ka empty shells ang narecover sa crime scene apang indi pa mapat-od kun ano nga armas ang gingamit sang mga suspetsado.

Sa karon, may yara na sang persons of interest ang Police Station 9 sa may kahimuan sang krimen.

Samtang, ginpahayag man sang anak sang biktima nga si Jessa Emnace nga wala sang nasuya sa amay sini kag madugay na ini nagapataya sa STL kag kun makaisa nagadala pa ini sang prutas kag ibaligya.

Ginpahayag man sini nga wala man sang pamahog nga nabaton ang iya amay.

Ang kaupod sini nga nagasakay sa tricycle ang pakaduha sini nga si Rolly Empase agud kuntani magremit sang taya.