Ginkumpirmar ni Bacolod City Administrator Em Ang nga isa sa mga dugang nga nagpositibo sa Delta variant sang COVID-19 ang nadulaan sang kabuhi sang Agosto 24.

Madumduman nga kahapon, siyam ka mga Bacolodnon ang dugang nga nagpositibo sa Delta variant sang COVID-19.

Ginakabig naman ang mga ini nga recovered bangud Agosto 18 pa sila ginkuhaan specimen kag nakatapos na isolation apang santo sa protocol, ginpaidalum sila gihapon sa repeat test.

Apang sang Agosto 24, ginbawian sang kabuhi ang 57-anyos nagikan sa Barangay Mandalagan.

Samtang, ginpahayag man sini nga anum na ka sunod-sunod nga adlaw nga nagadangat sa masobra 100 ang kaso nga nagadugang sa Bacolod City.

Wala sini ginadula ang posibilidad nga ang Delta variant ang rason sang pagsaka sang kaso apang wala sang problema sa oxygen supply sang ciudad.

Nagapati naman ang city administrator nga paagi sa pag-accelarate sang vaccination program, mas mapanubo ang kaso bangud kun vaccinated ang isa ka persona, mild lang masami ang ila sintomas kag may dugang ini nga proteksyon.

Nagpanugyan ini sa mga pumuluyo nga apisar nga fully vaccinated na, magsunod gid gihapon sa mga health protocols kag nagpanghakat sa mga wala pa nabakunahan nga magpadulong sa mga vaccination centers sa ciudad.