Daku ang pagpasalamat ni Nanay Gemma Delos Santos, 66 anyos, residente sang Purok Tilapia, Brgy. 3, Bacolod City sa mga may bulawanun nga tagipusuon nga nagsabat sa panawagan sini para sa nagamasakit nga bata.

Madumduman nga nakigbahin sang estorya sa kabuhi si Nanay Gemma sa Kahapon Lamang sang Huwebes kun sa diin ginsaysay sini ang sitwasyon sang 36 anyos nga bata nga si Jesus Delos Santos Jr.

photo by Bombo News Team

Si Jesus ang nagasuprer sang balatian nga pneumonia nga gindakop naman sang tuberculosis.

Bangod sa tuman nga ubo, nagbuswang ang tutunlan sini kag haluson indi na makakaon.

Apisar nga ginadangop nalang sini sa Ginoo ang sitwasyon sang anak bangod sa sitwasyon sang mga ini nga manugbasura lamang, nagdangop man ini sa mga tagpalamati kag nangayo sang bulig para sa bata.

Matapos ang programa, gilayon naman nga nagpalab-ot sang bulig ang mga tagpalamati sang Bombo Radyo kag sa karon, nagdangat na sa P9,500 ang natipon.

Ginapasalamat naman sa Ginoo ni Nanay Gemma ang mga nabatun nga donasyon para sa anak kag pahayag sini nga ang Ginoo na ang magabalos sang pilo sa ila kaalwan.

Suno diri, daku ang mabulig sang mga naghatag sang donasyon agud nga mabakal ang mga panginahanglanun sini kaangay sang prutas kag mga bulong, apisar nga indi na ini makatulon ang tabletas.

Samtang may pila pa ka mga dugang nga nagpledge sang bulig kay Nanay Gemma para sa anak sini nga si Jesus Delos Santos Jr.