Nagdangat na sa masobra 200 mil ang subscribers sang isa ka siyam ka tuig nga YouTuber kag vlogger sa Barangay Bata, Bacolod City.

Nahibaluan nga nangin viral si Mary Grace Escober sa social media matapos nga magselebrar ini sang nag-angkon sang duha ka subscriber sa YouTube.

Gindayaw naman sang mga netizens ang mapasinalamaton nga ugali ni Escober gani gilayon nga nagsaka ang subscriber sini sa 100 mil sa sulod lang sang walo ka oras sadtong Oktubre 12.

Samtang wala pa man mag-isa ka semana, nadoble na ini kag nagdangat na sa 200 mil.

Si Escober ang isa na ka Grade 4 student kag naga-eskwela sa Bata Elementary School 1.

Nag-umpisa naman ini sa vlog sang Hulyo bangod luyag lang nga magvideo-video.

Nagpasalamat man ini sa mga nagsuporta sa iya.

Sa interview naman sang Bombo Radyo Bacolod sa iloy ni Mary Grace Escober nga si Cecil Escober, ginpahayag sini nga wala gid ini naghuna-huna nga mangin sikat ang anak bangod wala man ini makahibalo sa ginhimo sini.

Suno sa iloy, ginregaluhan sang cellphone sang pakaisa si Mary Grace bangod sa honor student ini kag sya lang mismo ang nagbuhat sang YouTube account.

Pahayag ni Cecil nga natingala man bisan ang kaingod balay nga nagviral sa YouTube ang anak.

Bangod naman sa gulpyada nga pagviral, wala nakatulog sa amo nga adlaw si Mary Grace sa pagbantay sa pagsaka sang subscriber sini tubtob sa magdangat sa alas-2:00 sang kaagahun.

Sa karun, ginaguide nalang sang mag ginikanan sini ang bata sa mga dapat hemuon, apang ginapabay-an lang nila ini nga maghambal bangod indi man nila luyag nga mangin scripted ang unod sang vlog.

Nagapati naman si Cecil nga maintindihan sang netizen kun may mga pagsala ini bangod lamharun palang ang edad.

Ginabantayan lang sang mga ini nga indi ini makahambal sang mga wala nagakaigo nga pagkabutang.

Dugang pa sang iloy nga nakabatun man ini sang kuntrata sang tatlo ka tuig sa isa ka entertainment industry para mangin artista dugang pa sa mga advertisement.

Nakabatun man sang interview si Mary Grace gikan sa isa ka radio station sa London.