Pabor ang pinuno sang Alliance of Concerned Teachers (ACT) Negros Occidetal sa postponement sang klase sa Oktubre 5 apang naga-apelar ini nga idugon pa gid ang klase sa Enero sunod nga tuig.

Suno kay Dr. Gualberto Dajao, nalipay ini nga mangin matulutawhay na ang pamatyag sang mga manunudlo bangod sa gin-anunsyar nga postponement sang klase.

Luyag naman sini nga iduso ang pagpalawig pa sang postponement kag pagbukas nalang sang klase sa Enero 2021 bangod sa tuman ka dasig nga paglapta sang COVID-19 infection.

photoa from Dajao fb page

Ginakahangawa man sini ang padayon nga pagreport sang mga manunudlo sa mga eskwelahan bangod sa pag-asikaso sang mga modules samtang ang kadamuan naman sa mga buluthuan ang ginagamit man nga quarantine facility.

Mas maayo naman sa panulok sini kun mahatagan pa sang panahon para sa preparasyon kasubong man sang budget angot sa reproduction sang mga gamit sa edukasyon ang mga manunudlo.

Apisar nga ginaklaro nga may pondo na ang DepEd, nahibaluan nga indi naman ini madali-dali nga maihatag.

Nagakabalaka man si Dajao nahanungod sa kakulang sang ipanghatag nga modules kung madayun ang pagbukas sang klase Agosto 24.

Karon nga ginpostpone ang klase, daku naman ini nga kahigayunan nga makabakal ang mga manunudlo sang magamit nga laptop para sa pagpatigayon sang klase karun nga may pandemya.

May kahigayunan naman nga liwat makapangayo sang dugang pa nga pondo sa gobyerno para sa edukasyon.

Mas makamaayo man kung makapatuman sang mass testing para sa mga manunudlo antes paman ang pagsugod sang klase.

Ginapangamuyo man sini nga antes paman ang Oktubre 5 mangin maayo na ang kahimtangan sang COVID-19 sa pungsod kasubong man nga makakuha sang aprubado nga bakuna batok sa balatian.

Suno kay Dajao, kun sa Oktubre amo man gihapon ang sitwasyon sang COVID-19 sa pungsod magahingyo ini sang dugang pa nga postponement sang klase.

Ginpaathag naman ni Dajao nga ang postponement indi rasun para magpahuway ang mga manunudlo, kundi magaserbe ini nga preparasyon agud mapanami pagid ang kalidad sang pagtudlo.