Nagapamatok ang grupo nga Environmentalist Socialist Incorporated sa pagtukod sang access road nagikan sa Calatrava padulong sa Barangay Patag, Silay.

Sa interview sang Bombo Radyo kay Randy James Rojo, presidente sang nasambit nga grupo, ginpahayag sini nga nagapamatok sila sa pagpatukod sa dalan bangud madalasa diri ang Northern Negros Natural Park nga nasulod sa protected area subong man ang water shed sang Negros Occidental nga ginakuhaan sang tubig.

ctto

Suno kay Rojo, more or less 20 kilometers na sang mga kahoy ang nabuldos santo sa ila survey kag kun magapadayon ini, linibo gid ka mga kahoy ang madula.

Suno sa iya nagsulat ini sa City Environment & Natural Resources Office (CENRO) sang Bago kag Cadiz kag suno sa ila, wala pa sila Environmental Compliance Certificate (ECC) samtang suno naman sa Department of Environment and Natural Resources (DENR) Region 6, gin-issuehan sila sang ECC sang Marso 2019.

Suno sa iya, dapat antes mag-issue sang ECC, mapatigayon anay sang public kag community consultation apang wala gid sang may nahimo nga konsultasyon ilabi na sa mga apektado nga indigenous group gani nagapati ini nga wala naagi sa insakto nga proseso ang proyekto kag ginlapas ang Republic Act 11038 ukon Expanded National Integrated Protected Areas System (Nipas) Act of 2018.

Gani, nagapanawagan ini sa gobyerno nga manindugan para sa mga kahoy kag kasapatan antes pa man ini makalbo.

Suno sa iya, ang gobyerno dapat ang mangin ehemplo sa mga constituents indi kay sila pa ang magatolerar sang indi pagsunod sa proseso.

Suno kay Rojo, nagaubra sila sa karun sang tikang paagi sa pagpadala sa sulat sa Protected Area Management Board, Department of Environment and Natural Resources-Environmental Management Bureau (DENR-EMB), Department of Public Works and Highways (DPWH) paagi kay Secretary Mark Villar agud makahibalo man ini kun ano nga klase sang proyekto anhg ginaduso sa probinsya.