Ginkumpirmar sang provincial administrator sang Negros Occidental nga sarang na nga makasulod sa probinsya ang mga pumuluyo nga fully vaccinated batok sa COVID-19 maskin wala sang negatibo nga RT-PCR test apang kinahanglan nga fully verified ang ila vaccination card.

Sa interview sang Bombo Radyo kay Atty. Rayfrando Diaz, ginpahayag sini nga kaangay lang nga protocol ang igapatuman sa probinsya sa bulan sang Oktubre santo sa executive order nga ginpagwa ni Governor Eugenio Jose “Bong” Lacson kun sa diin kinahanglan gihapon sang S-PASS.

Agud makakuha sang S-PASS suno kay Diaz, kinahanglan sang negatibo nga RT-PCR test result ukon verified nga vaccination card.

Suno diri, kun verified na ang isa ka vaccination card, dapat magareflect ini sa MIS ukon Management Information System sang probinsya ukon sa vaccination portal sang Department of Information and Communications Technology (DICT).

Suno sa provincial administrator, kun fully verified na ang vaccination card, indi na kinahanglan pa sang negatibo nga RT-PCR test agud makakuha sang S-PASS.

Ini agud mabuhin-buhinan ang gasto sa RT-PRC test kag hugot nga ginarequire nga verified ukon nagareflect gid sa portal ang vaccination card agud malikawan ang pagpeke sang nasambit nga dokumento.