-- ADVERTISEMENT --

Dakop ang duha ka mga gina-aligar miyembro sang Cuadra Robbery Group sa ginpatigayon nga drug buybust operation sang Bacolod Police Station 5 sa Purok Sigay, Barangay 2, Bacolod City.

Ginkilala ang mga nagkaladakpan nga sanday Anthony Cuadra, 31 anyos; kag Raymond Espinosa, 28 anyos, kag lunsay mga residente sang nasambit nga lugar.

Sa interview sang Bombo Radyo kay Police Captain John Christopher Masangkay, station commander sang Bacolod Police Station 5, madugay naman nila nga ginamonitor ang duha ka mga suspetsado antes ginpatigayon ang buybust operation.

Narekober sa mga ini ang onse ka plastic sachet sang suspected shabu nga nagabug-at sang 12 grams kag nagabalor sang P81,600.

Dugang pa nga nakuha sa paghinakop sa mga ini ang P500 buybust money kag iban pa nga drug paraphernalia.

-- ADVERTISEMENT --

Ginpahayag man nga si Cuadra ang nadakpan man sadto bangud sa iligal nga droga apang wala mapat-od kun ano nga tuig.

Nakahunong na ang mga ini sa Bacolod City Police Station 5 kag magapangatubang sa paglapas sa RA 9165 ukon Comprehensive Dangerous Drugs Act of 2002.