Liwat nga ginkilala ang mga deklibre nga programa sang Bombo Radyo Philippines sa ginhiwat nga virtual 42nd Catholic Mass Media Awards (CMMA).

Ginpangalanan bilang Best News Feature ang Top of the Hour News sang Star FM Roxas.

Samtang, nakabaton sang Special Citation sa Best Counseling Program ang Kahapon Lamang sang Bombo Radyo Iloilo, mangin ang Bombo News and Views AM Edition sang Bombo Radyo Koronadal.

Una diri, naglab-ot sa 13 ka mga programa sang Bombo Radyo Philippines ang ginkilala bilang finalists sa nasambit nga media awards.

Ang prestigious Catholic Mass Media Awards ang gintukod sang nagtaliwan nga si Manila Archbishop Jaime Cardinal Sin sang tuig 1978 bilang pagkilala sa mga programa nagikan sa nagkalain-lain nga bahin sang media nga nagaduso sang basic human values kaangay sang pagpalangga sa Diyos, respeto sa palibot, pagpadayon sang positibo nga pamataas sang Pilipino kag paghatag sang importansya sa kabuhi.

Nalakip man sa mga programa sang Bombo Radyo Philippines nga nakasulod bilang finalist amu ang Walang Iwanan by Toto Sorioso/ Bombo Radyo Philippines para sa Best Inspirational Song; Bombo Special Report sang DYFM Bombo Radyo Iloilo, Pista ng Itim na Nazareno sang 102.7 Star FM Manila, People Living With Hope sang 102.7 Star FM Manila kag Feast of Saint Lorenzo Ruiz sang Bombo Radyo Baguio para sa Best News Feature; Bombo Lifestyle sang Bombo Radyo Iloilo para sa Best Public Service Program; Recuerdos dela Vida sang Bombo Radyo Tuguegarao kag Kahapon Lamang sang Bombo Radyo Bacolod bilang Best Counseling Program; Bombo Hanay Bigtime sang Bombo Radyo Baguio para sa Best News Commentary; kag Bombo News and Views Afternoon Edition of Bombo Radyo Tacloban para sa Best News Program.