Magapatigayon sang ocular aerial inspection ang pinuno sang committee on environment sa Sangguniang Panlalawigan agud matumod ang ginhalinan sang pagbaha sa Northern Negros Occidental.

Madumduman nga ginbaha ang Northern Negros Occidental sang Enero 1, Enero 8 kag Enero 9 bangud sa wala untat nga pag-ulan kag pila ka mga local government units ang naapektuhan ini nga ginalakipan sang syudad sang Escalante, Sagay, Cadiz, Victorias, Silay, Talisay kag banwa sang Toboso, Manapla kag EB Magalona.

Sa press conference, ginpahayag ni 3rd District Board Member Andrew Montelibano nga nagpatawag sila sang committee meeting agud diskusyunan ang nagluntad nga pagbaha.

Sa committee meeting nila nahibaluan nga may yara sang catch basin ang suba sa Silay.

Magapatigayon sila sang ocular aerial inspection agud nga mahibaluan kun bala nag-awas ang catch basin bangud sa pag-ulan ukon may natiphag nga wala sang may nakahibalo.

Ginpatawag niya man ang Provincial Environment Management Office (PEMO) bangud sa report nga ang flash flood ang mahimo gintuga sang abuse quarrying bangud may yara sang mountain kag river quarries nga illegal.

Libuton man nila ang probinsya agud matumod ang mga gintunaan sang pagbaha kag bisan ang mga quarry permits sang iban nga nagapatigayon sang quarry operations ang ila man reviewhon bangud ang pagpatigayon sang river quarry ang may ginasunod nga protocols kaangay insakto nga embankment kag dapat may design ini kag indi pinagusto lang nga kotkot.

Nakita man sang Committee on Environment nga nagkambyo na ang ilig sang tubig sa probinsya.

Nagapati man ang board member nga kun matun-an kag maplanuhan ang tanan, bisan indi mapunggan ang pagbaha apang mahimo nga mapahagan-hagan ang epekto sini.