Gin-anunsyar ni Bacolod City Mayor Evelio “Bing” Leonardia kahapon nga magahakuha sang 650,000 doses sang AstraZeneca vaccine ang ciudad sang Bacolod para sa pagsugod sang vaccination program sang ciudad.

Suno kay Leonardia, ini ang isa ka dako nga tikang agud malab-ot sang ciudad ang target sini tuhoy sa vaccination.

Suno sa iya, nagperma ini sang deal kaupod ang Oxford-British firm gani nagpasalig ini nga dako nga numero sang populasyon ang sarang nga mabakunahan kun mangin available na ang produkto sa Pilipinas.

Gindugang man sini nga luyag niya kuntani ini nga ipahibalo sang mas timprano apang kinahanglan niya nga tumanon ang confidentiality clause nga nakabutang sa ila kontrata.

Suno sa alkalde, nangayo ini sang consent sa AstraZeneca antes gin-anunsyar ang nasambit nga tikang.

Ginakabig ini ni Leonardia nga maayo nga panugod kag iya man ginapasalamatan si Vice Mayor El Cid Familiaran kag ang Sangguniang Panlungsod sa ila kooperasyon.

Nahibaluan nga ang lima ka mga ciudad nga nalakip sa prayoridad sang pungsod nga pagahatagan sang bakuna amo ang Bacolod City, Davao, Quezon, Makati kag Manila.