Magapaidalom sa 14 ka adlaw nga mandatory quarantine ang mga residente sang Cadiz nga nagikan sa high risk areas sang COVID 19 kalakip na ang ciudad sang Bacolod sa tion nga sila ang magpauli apang may yara man sang exceptions.

photo from web


Sa interview sang Bombo Radyo Bacolod kay Mayor Salvador “Bading” Escalante, indi absolute ang gin-issue sini nga executive order bangud exempted diri ang mga frontliners, mga essential pass holders kaangay sang mga negosyante kag authorized persons outside residence ukon APOR nga indi na kinahanglan nga magpaidalom sa home ukon facility quarantine.


Suno kay, Escalante ang mapaidalom sa 14 days quarantine ang pumuluyo nga magapauli sa syudad nga nagikan sa high risks areas kaangay sang Bacolod City, National Capital Region kag Cebu City kun nakatinir sila sa ginhalinan nga lugar sang masobra tatlo ka adlaw.


Mahimo ang mga ini nga magpaidalom sa home quarantine kun nakapasar ang balay nga tiniran sini sa standard sang Department of Health nga dapat may yara sang kaugalingon nga kuarto nga may yara sang kaugalingon nga banyo.

Kun wala naman nakapasar sa standard sang DOH, magaquarantine sila sa quarantine facility nga ginhanda sang syudad.
Ginpahayag man ni Escalante nga ang mga pumuluyo na mismo ang nagareport sang mga kaingod sini nga bag-o lamang kaabot matapos ang madugay nga tion nga wala nakapauli.


Nagpahanumdom man ang alkalde nga masami magsuksok sang face mask kag face shield, mag-obserbar sang social distancing kag magpanghugas sang kamot.