Pabor ang bise alkalde sang Bacolod sa pagpatuman sang mandatory nga pagsuksok sang mga commuters sang face shield kun magsakay sa pampubliko nga transportasyon sugod subong nga adlaw.

Suno kay Bacolod City Vice Mayor El Cid Familiaran, pinuno sang Inter-Agency Task Force sang ciudad, sarang nga makapahagan-hagan sa paglapta sang virus ang mandu sang Department of Transportation.

photo by Bombo News Team

Ginpaathag man sini nga indi lang ang ilong ukon baba ang pwede masudlan sang virus, kundi amo man ang mata.

Ginapahanumdom man sini ang sunod-sunod na nga paglupok sang balatian sa nagkalain-lain nga ahensya sang gobyerno, kalakip na ang pinakabag-o nga nagtaliwan nga isa ka manugpanilhig sa Libertad Public Market.

Ginpahanumdom sang bise alkalde ang pagpabilin sang proteksyon sa kaugalingon, pagtuman sang social distancing kag iban pa nga mga protocols.

Ginpakigbahin man ni Familiaran nga may mga doktor naman nga nagadangop diri kag nagahilibion bangod sa kabudlayan nga ginapangatubang kasubong man sa mga reklamo sang mga negosyante angot sa kapyerdihan sang mga negosyo.

Apang pahayag sini nga wala naman sang mahimo kundi ang dugangan pa ang paghalong.

Ginpa-athag naman ni Familiaran nga ang igapatuman nga istrikto nga pagsuksok sang faceshield sumugod subong nga adlaw ang para lamang sa mga nagabyahe kag indi madala ang mga nagalakat.

Isa naman sa dako nga palamangkutanun suno kay Familiaran amo ang kuhaan sang produkto.

Nagapati ini nga gamay lang ang stock sang faceshield nga yara sa merkado sang ciudad.

Ginapasalamat naman sini ang pagpagwa sang Department of Trade and Industry (DTI) sang suggested retail price (SRP) nga P26-P50 para sa mga faceshield nga makabulig naman agud nga malikawan ang mga oportunista.

Nahibaluan nga kalabanan nga nagakatabo ang hoording rasun kun ngaa nagakadulaan sang mabaklan sa merkado sa tinutuyo nga mapasakaan sang presyo ang mga produkto kung tuman na kadamo ang nagakinahanglan.

Samtang ginklaro naman ni Familiaran nga temporaryo lang ang pagsarado sang Bacolod City Government Office, kag malauman nga istrikto nga ipatuman ang pagsuksok sang faceshield sa mga empleyo sa pagbalik.

Magluwas sa mga empeyado sang kapitolyo, igapatuman man ini sa mga kliyente nga magatransaksyon sa opisina.