Ginmanduan na sang pinuno sang Bacolod City Police Office (BCPO) ang tanan nga mga police stations sa Bacolod nga dugangan ang police visibility sa palibot sang ciudad kasunod sang asod-asod nga mga insidente sang pagpangluthang.

Nahibaluan nga humalin sang bulan sang Enero, malapit na sa napulo ang numero sang shooting incidents sa Bacolod nga kahimuan sang riding in tandem suspects.

Ang iban naman ang ginsulod sa ila balay kaangay sang maglive-in partner nga ginsulod sang suspetsado sa ila nga balay sa Purok Sigay, Barangay 2 kag gintiro.

Nagatulog pa sanday Rhanz Moore Banias, 29-anyos; kag Mary Liza Pahamutang, 36-anyos sang nagsulod ang suspetsado nga nagasuksok sang bike helmet kag face mask.

Gilayon nga napatay si Banias samtang nakaluwas naman si Pahamutang.

Ginsundan pa gid sang pagtiro sa 55-anyos nga si Eduardo Cataraja sa ila nga balay sa Purok Linya, Barangay Cabug sang Lunes sang gab-i.

Tubtub sa karon, wala sang natumod nga suspetsado sa nasambit nga mga krimen.

Sa interview sang Bombo Radyo Bacolod kay BCPO director P/Col. Manuel Placido, ginpahayag sini nga nagmando na siya sa tanan nga mga pulis ilabi na sa mga station commanders nga pabaskugon pa gid ang police visibility agud nga nga malikawan ang iban pa nga shooting incidents.

Suno sa iya, dapat nga magpatigayon gid sang maid-id nga imbestigasyon sa amo nga mga insidente bisan ano pa ang background sang mga biktima.

Suno kay Placido, wala siya nalipay bilang isa ka city director sa mga nagakatabo nga pagpangluthang sa ciudad.

Gani nga luyag man sini nga makaangkon sang hustisya ang mga biktima.