Nagsaka sa masobra 90 porsyento ang enrollees sa banwa sang Toboso sang nagsugod ang ila programa nga “module baylo bugas”.

Sa interview sang Bombo Radyo Bacolod kay Toboso Mayor Richard Jaojoco, ginpahayag sini nga luyag nila nga mahatagan sang “motivating factor” ang mga ginikanan nga suportahan kag buligan ang ila mga kabataan sa pagpadayon sa pagpa-eskwela subong nga school year apisar sa ginapangatubang nga pandemic.

Gani agud nga makabulig, naglunsyar sang programa nga module baylo bugas ang local government unit sang Toboso.

Suno kay Jaojoco, yara na sila karon sa ika-tatlo nga semana sa pagpatigayon sang amo nga programa kun sa diin nagahatag ang LGU sang tag-isa ka kilo sang bugas sa kada estudyante nga nakapasa kag nakakumpleto sang ila nga module kada semana.

Suno sa alkalde, tanan nga mga estudyante nagikan sa elementary tubtob senior high school lakip na ang duha ka mga private schools kag Alternative Learning System (ALS) sa ila banwa ang naka-benepisyo sa amo nga programa.

Nagadangat naman sa 800 tubtob 1,000 ka sako sang bugas ang ila kinahanglan kada bulan para sa amo nga proyekto.

Suno kay Jaojoco, may yara na sang stock sang bugas ang ila LGU tubtob sa katapusan sang tuig.

Nagpasalig naman ini nga tubtob masarangan sang local government nga mapadayon ang amo nga programa, tinguhaan nila ini nga mapadayon agud nga maganahan ang mga kabataan nga mag-eskwela paagi sa modular learning.