Kabug-usan nga P6.5 million ang balor sang halit sa mga pananom nga gintuga sang pag-ulan kag pagbaha sang tinalikdan nga Domingo sa lima ka mga local government units sa Negros Occidental.

Sa interview sang Bombo Radyo kay Atty. Japhet Masculino, provincial agriculturist, ginpahayag sini nga lima pa lang ka mga LGUs ang nakasumiter sang ila report kag ini ang ginalakipan sang Sipalay City, Hinobaan, Moises Padilla, Pontevedra kag Cadiz.

Suno kay Masculino, ginalauman pa nga may iban nga LGUs nga magapasa pa sang ila nga report lakip na diri ang Valladolid kag Isabela.

Sa lima ka mga LGUs, suno sa iya, kapin P6.5 million ang balor sang halit nga natuga sang pagbaha sa mga humay, mais kag iban pa nga pananom sa kabug-usan nga 1,904 hectares kun sa diin 265 ka mga mangunguma ang naapektuhan.

Sa banwa sang Hinobaan, tatlo ka mga barangay ang nahalitan ang humayan nga may kabug-usan nga kalaparun nga 457 hectares kag 175 ka mga rice farmers ang apektado.

Nagabalor P4,275,000 ang balor sang halit sa nasambit nga banwa.

Walo naman ka barangay, 66 ka mga mangunguma, 1,254 ka hektarya ang naapektuhan sang baha sa Moises Padilla kun sa diin nagdangat sa P1.7 million ang balor sang halit.

Sa ciudad sang Sipalay, naapektuhan ang lima ka barangay, 172.5 hectares sang humayan, 24 ka mga rice famers kag may balor sang halit nga P322,000.

P180,000 naman ang halit sa mga pananum sa Cadiz kun sa diin tatlo ka barangay, walo ka mga rice farmers kag 19.5 hectares ang naapektuhan sang baha.

Isa ka barangay, duha ka mga manguguma kag 1.8 hectares naman ang apektado sa banwa sang Pontevedra kag may balor nga P67,000 ang nahalitan.

Suno kay Masculino, pagahatagan sang humay ang mga apektado nga LGU agud ila man ihatag sang mga rice farmers nga naapektuhan.

Ginatsekyar pa man sang Provincial Agricultural Office kun nakaparehistro ang mga ini sa Crop Insurance Program agud mabayaran ang ila mga humay nga nagkalaguba.