Patay ang bana nga seaman samtang pilason ang misis nga nurse matapos ginbungguan sang tricycle ang motorsiklo nga ila ginasakyan sa Escalante City, Negros Occidental, Lunes sang aga.

Sa impormasyon nga nakuha sang Bombo Radyo, papauli sa Brgy. Mabini, Escalante City sanday Julius kag Jackilyn Mata pasado alas 7:00 sang aga kag sila ang naga-angkasanay sa motorsiklo.

Pag-abot sa Brgy. Jonob-Jonob, sila ang ginbungguan sang sugata nga tricycle nga ginamaneho ni Archer Villaran nga empleyado sa city government sang Escalante.

Nag-overtake si Villaran kag wala nakabalik sa iya nga lane gani nagbunggo sa motorsiklo nanday Mata.

Bangud sa paghagmak sang iya ulo sa sementado nga highway, gilayon nga ginbawian sang kabuhi ang bana.

Ginapahayag nga nagadali si Villaran bangud magatambong pa ini sa flag raising ceremony.

Sa karun, ginabulong pa sa ospital sanday Jackilyn kag Villaran matapos mapilasan.

Ang mag-asawa nga Mata ang bag-o lang ginkasal.

Wala sila sang suksok nga helmet sang matabo ang insidente.