Natalana nga maglunsyar sang information education drive ang COVAC Council sa ciudad sang Bacolod agud nga mapaintindi sa publiko kun ano ka importane ang pagpabakuna batok sa coronavirus.

Sa interview sang Bombo Radyo Bacolod kay Dr. Chris Sorongon, deputy for medical services sang Bacolod Emergency Operations Center, ginpahayag sini ipresentar niya subong nga adlaw sa EOC kag sa Covac Council ang plano angot sa information education drive kag kun maaprubahan, maga-full swing sila sa masunod nga semana.

Suno kay Sorongon, unahon gid nila nga sapulon amo ang Liga ng mga Barangay bangud ang mga punong barangay ang may yara sang key role sa pagpalab-ot sang mga impormasyon sa ila mga pumuluyo.

Dugang pa sini nga importante gid katama nga kun hatagan ka sang bakuna, nakahibalo ka kun ano ina nga vaccine ini kag indi lang basta-basta nga magpatublok.

Tinutuyo sang ciudad suno sa iya nga ma-edukar ang mga pumuluyo kag indi mahadlok magpabakuna.

Gindugang pa ni Sorongon nga ang profiling committee ukon ang team nga nagapili sang mga iprioritize sa pagpabakuna ang may yara sang medical history record sang kada pumuluyo agud mahibaluan kun may allergy ini ukon comorbidities.

Suno sa iya, indi lang ang vaccine ang dapat kilalahon sang ciudad kundi dapat kilalahon man ang hatagan sang bakuna.

Ginapasiguro man ni Sorongon sa tanan nga Bacolodnon nga ang intensyon sang ciudad amo ang safety sang tanan.

Ginpasalig man sini nga mangin transparent gid ang city government sa tanan nga butang kag ila gid nga iduso ang bakuna nga pinaka-safe para sa pumuluyo.