-- ADVERTISEMENT --

Ginpahayag sang pinuno sang Committee on Returning Residents sang Bacolod City nga temporaryo ang mga ini nga magapadayon sa pag-aprubar sang tanan nga S-PASS application sa mga magapauli sa ciudad pinaagi sa eroplano.

Sa interview sang Bombo Radyo kay Councilor Cindy Rojas, nagapangayo ini sang pasaylo in behalf sang ciudad bangud kinahanglan gihapon nga magpasa sa S-PASS bangud nagarequire sini ang Negros Occidental agud makasulod sa Bacolod-Silay Airport nga sakop sang probinsya.

Suno kay Rojas, nagpagwa na sang executive order si Mayor Bing Leonardia nga indi na required ang S-PASS apang bangud napaidalum sa probinsya ang airport, wala sang may mahimo ang mga Bacolodnon kundi magsunod diri.

Gin-athag naman sini nga kun land trip kag sea trip, indi na kinahanglan sang S-PASS.

Gindugang man sini nga apisar nga sa Bacolod-Silay Airport nagalabay ang mga pasahero, ginaatipan man ini sang local government unit sang Bacolod kag wala na ginapalagaw.

-- ADVERTISEMENT --

Apang sa karun suno sa konsehal, wala sila sang may mahimo kundi magpadayon sa pag-aprubar sang S-PASS applications.

Gin-athag ni Negros Occidental Governor Eugenio Jose “Bong” Lacson nga magarequire gihapon sang S-PASS ang Bacolod-Silay Airport para sa convenience sang airlines.

Suno kay Lacson, kun negatibo nga RT-PCR test result ukon vaccination certificate lamang ang ipakita, kinahanglan pa ini nga ivalidate.

Apang kun S-PASS ang ipakita, indi na ini kinahanglan pa iverify bangud nakapasar na ini sa validation stage.

Gindugang man sini nga handa ang probinsya sa pagbaton sang applications para sa S-PASS.