Nagapanindugan si Bacolod City Mayor Evelio “Bing” Leonardia nga may kaugalingon nga pinsar si Fighting Senator Manny Pacquiao, indi ma under-estimate kag may kaugalingon nga lebel sang kaalam.

Paathag ni Leonardia nga wala na ini nagahatag pa sang unsolicited advice bangod nakahibalo na si Pacman sa kun ano ang pinakamaayo para sa iya.

Suno sa alkalde wala na ini sang maireklamo kag desisyon na sang 8-Divison World Champion kun ini ang magaretiro.

Bukas naman nga maghatag sang derekta kag personal nga advice si Leonardia sa tion nga pangayuan ini sang opinyon.

Samtang aminado naman ang alkalde nga excited ini sa tion nga nagalantaw sang hampang ni Pacquiao kag permi sini nga pangabay ang pagdaog sang Filipino Champion.

Nagapati naman ini nga ang presensya ni Pacquiao sa ring ang nagabutong man sang mga tumalan-aw gani ginalantaw man ni Leonardia nga kun iban nga boksidor ang main event kahapon sa T-Mobile Arena sa Las Vegas, Nevada, indi man mapuno ang arena.

Gindayaw naman sini kag gincongratulate si Pacquiao sa nangin hampang apisar nga ini ang nalutos.

Dugang pa ni Leonardia, nga masami nga ginapahayag ni Pacquiao nga luyag sini nga malingaw ang mga pumuluyo sa paglantaw ilabi na nga nagatutok sa iya ang bilog nga pungsod.

Suno sa alkalde, nagaisahanon lang ang Manny Pacquiao, nga dapat respetarun kag nagakadapat man nga mangin malipayon ang mga Pilipino sa nahemo sini indi lang sa boksing subong man para sa dungog sang Pilipinas.