Nakilala na ang babayi nga gintiro sa Purok Lampirong, Barangay 2, Bacolod City kahapon sang udto.

Sa interview sang Bombo Radyo Bacolod kay Police Lt. Andy Ofalia, deputy station commander sang Bacolod City Police Station 2, natumod na ang matuod nga pangalan ni Alyas Loraine, siya si Lorensa Prado, 33 anyos, single kag residente sang Talisay City, Negros Occidental.

Duha ang napatay sa nasambit nga shooting incident kun sa diin naigo sa ulo si Prado samtang ginbawian man sang kabuhi si Alyas Chris sang Barangay Mansilingan, Bacolod City matapos maigo man sa ulo.

Tubtub subong, ginatumod pa sang mga kapulisan kun ano ang matuod nga pangalan ni Chris.

Suno kay Ofalia, nagagwa sa inisyal nga imbestigasyon nga kilalahay ang duha ka biktima kag ang suspek, kag sila ang may mga grupo.

Wala pa matumod kun ano ang natabo apang ang una nga tiro ang nagikan sa sulod sang balay kag naggwa si Alyas Chris apang wala maantisipar nga ginsunod pa ini sang suspetsado kag liwat nga gintiro nga gintunaan sang gilayon nga kamatayon.

Suno sa deputy station commander, may yara na sila sang lead kun sin-o ang suspek apang indi pa mapalayag sa kahanginan bangud padayon pa ini nga ginapangita matapos nga magpalagyo kasunod sang insidente.

Ginsirado man ang boarding house sang mag-abyan kag wala man mahibaluan kun sin-o ang nagapanag-iya sini bangud wala man sang nagpalapit sa tropa sang ginpadulungan nila matapos magluntad ang pagpangluthang.

Padayon pa ang hot pursuit operations sang mga kapulisan kag ginatinguhaan nga madakpan agud nga mapasakaan sang nagakaigo nga kaso.