Patay ang anay miyembro sang Mancao armed group matapos ginluthang sang duha ka mga wala pa makilal-an nga mga suspetsado sa Sitio Dagoydoy Brgy. Minaotok banwa sang Calatrava nagligad nga Setyembre 22.

Ginkilala ang biktima kay Mark Baytan, alyas Pilo, 23-anyos kag residente sang Sitio Paraiso sa amo nga barangay.

Sa interview sang Bombo Radyo Bacolod kay P/Major Roberto Indiape, hepe sang Calatrava Municipal Police Station, ginpahayag sini nga samtang nagapang-tapas sang tubo si Baytan, hinali nalang nga may nagpalapit nga duha ka mga lalaki sa iya kag ginpamangkot kun siya si alyas Pilo.

Pagkatapos magsabat sang biktima nga siya ang persona nga ginapangita sang duha, gilayon nalang nga naggabot sang armas ang duha kag gintiro sang makapila ka bes si Baytan.

Nakaangkon sang madamo nga pilas tuga sang pagkaigo sang bala sa nagkalain-lain nga bahin sang iya lawas ang biktima nga gintunaan sang iya gilayon nga kamatayon.

Nagpalagyo naman ang duha ka mga suspetsado sakay sa motorsiklo.

Suno kay Indiape, personal nga dumot ukon posible pagtimalos ang ginalantaw nila nga motibo sa krimen.

Sa karon padayon pa ang imbestigasyon sang kapulisan angot sa insidente.