-- ADVERTISEMENT --

Nagpanawagan ang alkalde sang Nabas, Aklan nga mabuligan sang lokal nga gobyerno sa Negros Occidental ang mga pumuluyo sini nga ginrecruit bilang tapasero sang tubo sa Hacidena Candelaria, La Carlota City kag ginaalegar nga naka-eksperyensya sang pagmaltratar.

Suno kay Mayor James Sulanoy, nag-agi man sa Department of Labor and Employment (DOLE) ang pagrecruit sa kapin 20 ka mga pumuluyo gikan sa isa ka barangay sa ila nga banwa.

Ang ginaproblema sini karun bangod nakabatun na sang P15,000 nga anticebo ang kada isa sa mga sakada, apang sa karun nagapanawag ang mga ini sa ila nga nagakinanglan sang bulig.

Santo sa nabatun nga impormasyon sang alkalde, indi maayo ang pagtratar sa mga tapasero kasubong man indi makabatun sang nagakaigo nga pagkaon.

Suno kay Mayor Sulanoy, maayo man ang ila nga pag-estoryahanay antes maghalin sa Aklan apang indi na maayo ang nadangtan sang mga ini pagdangat sa Hacienda Candelaria.

-- ADVERTISEMENT --

Nagahingyo man ang alkalde nga tratuhon bilang tawo ang mga sakada nga tuman ang pagtrabaho.

Aminado man ini nga nabatian naman sini nga madamo sang ensurhensya sa probinsya nga ginalantaw niya mahimo tuga sang nagapangpigos nga mga recruiter.

Nagahingyo ini sa lokal nga pagdumalahan nga buligan man ang iya nga mga pumuluyo bangod ang local nga gobyerno ang pinakamadasig nga makapalab-ot sang bulig sa tion sang emerhensya.

Nagahimo man ini sang paagi agud mabuligan ang mga sakada apang nabudlayan ini ilabi na sa mga pagsulundan maykaangtanan sa COVID-19 pandemic.

Nagapadala naman ini sang kwarta agud lang nga may mabakal sang pagkaon ang ang mga sakada.

Nahibaluan nga indi makagwa ang mga sakada kag ginapabantayan sang mga gwardiya santo sa alegasyon sang tatlo nga nauna nga nagpalagyo kadungan pa sa pagpamahog nga I-shoot to kill ang mga ini kun magpalagyo sa lugar.

Ginpasalamatan man sang alkalde ang Bombo Radyo Bacolod nga nangin rasun agud mapalab-ot sa iya ang sitwasyon sang iya mga pumuluyo.

Aminado man sang alkalde nga apisar indi ini makasiling nga sa kontraktor gid man ang problema bangod mahimo nga may problema man sa bahin sang iya mga pumuluyo, apang panugyan lang sini sa opisyales sang syudad nga tamdon ang iya mga pumuluyo.

Nagapati man ini nga ipatawag sang DOLE ang mga recruiters nga ginkilala kanday Wilma Alpas kag Jovani Alpas.

Sa karun, gina-asikaso naman ni Mayor Sulanoy ang mga pamaagi nga makapauli ang mga tapasero kag ginalantaw man sini ang posibilidad nga bawion ang P15,000 nga anticebo.