-- ADVERTISEMENT --

All set na ang Alangilan National High School sa pilot run sang limited face-to-face classes sugod subong nga adlaw.

40 lamang ka mga estudyante sa Grade 12 ukon senior high school ang magaparticipate diri kag wala na sang iban nga year level.

Ang una nga batch nga may 20 students ang magakadto sa eskwelahan apat ka adlaw sa isa ka semana kag sa aga lang ang klase, samtang ang ikalima nga adlaw ang gintalana para sa disinfection sang classroom.

Ang ikaduha nga batch ang lakipan naman sang 20 ka mga estudyante kag lain naman nga batch sang manunudlo ang magatudlo.

Para sa laboratory class, 12 lamang ka estudyante ang dungan nga makasulod sa classroom.

-- ADVERTISEMENT --

Sa interview sang Bombo Radyo kay Bacolod City Mayor Evelio “Bing” Leonardia , naghatag ini sang pagpahanugot verbally sa pag-implementar sang pilot face-to-face classes sa Alangilan National Highschool nga maga-umpisa subong nga adlaw.

Suno kay Leonardia, gintawagan ini nanday Vice Mayor El Cid Familiaran, Emergency Operation Center (EOC) Executive Director Em Ang kag Councilor Renecito Novero nga amo ang Chairman sa Committee on Education sa Sangguniang Panlungsod, nga nagapahayag nga kinahanglan sang mga ini ang approval sang local chief executive antes makapatigayon sang face-to-face classes.

Ginpinsar pa sini nga sa bilog nga syudad na ipatuman ang in-person classes, gani sang maathagan ini nga experimental palang ukon pilot implementation kun sa diin duha palang ka klase sa Grade 12 students nga pagatungaon sa tag-20 sa kada batch, gilayon man ini nga nagpahanugot.

Subong nga adlaw ginalauman ang pagpadulong sang alkalde sa buluthuan sa opening sang limited face-to-face classes agud personal nga makita ang pagpatuman.

Nagapati si Leonardia nga nakapreparar na ang Alangilan National Highschool.