Dead on the spot ang isa ka 44 anyos nga lalaki matapos ginlabo sang iya upod sa ilimnan sa Purok Malipayon, Barangay Cabug, Bacoliod City, Pebrero 24 sang kaagahon.

Sa interview sang Bombo Radyo kay Police Lt. Laine Deriada, officer-in-charge sang Bacolod Police Station 9, ginpahayag sini nga alas 12:15 sang kaagahon sang Miyerkules nagluntad ang krimen kun sa diin naga-inom-inom sanay Rodel Ansag, 23 anyos, residente sang Isabela, Negros Occidental apang temporaryo nga nagapuyo sa Barangay Cabug kag Allan Cordova, 44 anyos, residente sang Barangay Maao, Bago City, lunsay mga trabahante sa isa ka uma.

Suno kay Deriada, madugay na nga may indi pag-intindihanay ang duha kag bangud lunsay hubog, naglalisay sila kag ginlabo ni Ansag si Cordova.// Nakaangkon ang biktima sang igo sa kamot kag ulo nga gintunaan sang iya kamatayon.

Suno diri, ila pa hulaton ang autopsy report sa kamatayon ni Cordova samtang boluntaryo naman nga nagsungka si Ansag sa mga kapulisan.