3 centenarians sa Mountain Province, nakatanggap ng tig P100-K na cash incentives

BAGUIO CITY – Nakatanggap ng tig-P100,000 incentives ang tatlong centenarians sa Mountain Province sa magkakahiwalay na okasyon.

Kinilala ni Governor Bonifacio Lacwasan Jr. ang mga centenarians na sina Esther Kilangan Chapyosen, 102, mula Maligcong, Bontoc; Lourdes Ambatcan Bulaec, 102, mula Gonogon, Bontoc; at Essao Antonio Sidchayao, 109-anyos, na mula naman sa Belwang, Sadanga.

Ayon sa gobernador, ang pagbibigay nila ng cash incentives ay salig sa Centenarians Act of 2016.

Samantala, sinabi ng anak ni Chapyosen na  kayang-kaya pa ng kanilang ina ang magtungo sa bukid para magbunot ng mga damo habang kaya pa ni Bulaec ang magbasa kahit wala itong eyeglasses.

Napag-alamang hindi rin umiinom ng anumang maintenance ang dalawang lola.