Traffic re-routing, ipatuman subong nga adlaw kadungan sang kapiyestahan Nuestra Señora de la Candelaria

ILOILO CITY–May yara sang patigayunon nga  traffic re-routing subong nga adlaw, Pebrero 2, may kaangtanan sa kapiyestahan ni Nuestra Señora de la Candelaria.

Ini bangud nga siraduhon ang mga dalanon sa palibot sang Jaro plaza kag Jaro Cathedral agud nga hatagan sang ligwa ang pagdagsa sang linibo ka mga deboto.

Sa interview sang Bombo Radyo kay Jeck Conlu, pinuno sang Public Safety and Transportation and Management  Office (PSTMO), iya ginpahayag nga alas 4:00 kaina sang kaagahon, pagasiraduhon na ang dalan sa atubang sang Jaro Cathedral.

Paglab-ot sang alas 3:00 karon sa hapon, siraduhon na ang tanan nga dalan sa palibot sang Jaro Plaza kag Jaro Cathedral.

Ini bangud nga alas 4:00 karon sa hapon, magaumpisa ang procession nga maga-agi sa E. Lopez St., liko M. Jayme Street kag Commission Civil, padulong sa Lopez Jaena St., Fajardo Street, Libertad Street balik sa Rizal Street  pa Jaro Cathedral.

Bangud sini, ang mga Public Utility Jeepney (PUJ) nga may byahe Jaro CPU kag Jaro CPU Ungka ang maga-agi sa Fajardo Street, Cuartero, El 98, Diversion road, Jalandoni padulong sa likod sang Iloilo Sports Complex padulong sa city proper area.

Sa pagbalik naman, ang mga Jaro CPU kag Jaro CPU Ungka nga PUJ ang maga-agi sa Javellana, MH Del Pilar, Simon Ledesma padulong sa ila original nga ruta.

Ang mga PUJ naman nga naghalin sa Leganes area anga mahimo nga mag-agi sa Quintin Salas, Sambag, Jaro, Diversion Road padulong sa orihinal nga ruta samtang ang ALEOSAN naman nga PUJ ang kutub lamang sa Cuartero kag El 98.