Suldalo nga namatay sa Maguindanao encounter, ginakabig sang iya pamilya bilang baganihan

KORONADAL CITY – Nagbubo ang emosyon sang mga himata kag pamilya sang suldado nga namatay sa engkwentro sa Barangay Elian Datu Saudi Ampatuan Maguindanao batok sa rebelde nga BIFF sang napauli ang bangkay sini sa ila puloy-an sa siyudad sang Tacurong.

Miyembro si Cpl. Ian Cajeta sang 21st Mechanized Company, 2nd Mechanized Battalion sang Philippine Army, 30 anyos , sultero kag residente sang Mabini street Brgy Poblacion sa nasambit nga siyudad.

Ginpahayag sang iya iloy nga si Ginang Honorata Cajeta, indi niya kuntani luyag mangin suldado ang iya bata apang wala siya sang mahimo bangud handum niya ini.

Apesar wala pa nila nabaton ang natabo, makabig nila nga baganihan ang ila bata nga nagbuhis sang kabuhi agud maproteheran ang pungsod batok sa mga rebelde.

Base sa military report, namatay si Cajeta sa tion sang military operation batok sa BIFF kun sa diin nakaangkon ini sang igo sang bala sa dughan.

Magluwas kay Cajeta, ginpapauli man sa ila tagsa-tagsa ka mga panimalay ang mga nagkalamatay man sini ang iya mga mistah nga sanday 2nd Lt Junibert Zunio sang Aklan, kag Sgt Jose Nasar De Luna sang Sarangani province.

Nahibaloan nga ikaduha sa tatlo nga mag-ulutod si Cajeta kag kilala ini sa ila lugar nga buot sa isigkatawo.

Padayon sa gihapon ang opensiba sang militar batok sa rebelde nga BIFF kun as diin lima ang pilason sa bahin sang gobyerno.