Edsa ShrineBinigyang-diin ngayon ng Malacañang ang kahalagahan ng tungkuling ginagampanan ng media partikular sa pagbabantay ng kalayaan.

Mensahe ito ng Malacañang na ipinarating sa Bombo Radyo ni Presidential Spokesman Edwin Lacierda kasabay ng paggunita sa mga kaganapan noong Pebrero 23, 1986.

Sinabi ni Lacierda na hindi maaaring masupil ang kalayaan sa pamamahayag lalo na sa panahon kung saan naaabuso ang mga karapatan ng mamamayan.

Ayon kay Lacierda, magandang pagkakataon ang EDSA anniversary para alalahanin ang mahalagang tungkuling ito ng media sa lipunan bukod sa pagiging ‘partner’ ng
gobyerno sa pagsusulong ng kaunlaran.

Sa pagbabalik tanaw 26 na taon na ang nakakaraan o noong Pebrero 23, 1986, araw noon ng Linggo, ipinasara ng mga puwersa ng gobyerno ang main transmitter ng Radio Veritas at natigil ang pagsasahimpapawid hanggang sa mga lalawigan.

Sa kabila nito, dahil sa naging panawagan ni Cardinal Sin noong kinagabihan, nagsadya pa rin ang mga tao sa EDSA para protektahan ang mga rebeldeng sundalo mula sa Marcos loyalists.

Samantala, pagkatapos ng panaghalian nang araw ding ‘yon, nagkasundo ang grupo nina dating Defense Minister Juan Ponce-Enrile at dating Hen. Fidel Ramos na magsanib puwersa.

Tumawid si Enrile mula Kampo Aguinaldo papuntang Kampo Crame kung saan siya sinalubong ng hiyawan ng mga taong nagtitipun-tipon sa EDSA.

“While media is a partner of government, media must continue its role as a watchdog for freedom especially in times when our rights are being curtailed,” bahagi ng mensahe ni Lacierda sa Bombo Radyo.