KamaraTuluyan nang ibinasura ng minority bloc sa Kamara ang inihaing impeachment complaint laban sa Pangulong Benigno Aquino III.

Ayon kay House Minority Leader Danilo Suarez, base umano sa kanilang pag-aaral, mahina ang mga alegasyon ng negosyanteng si Danilo Lihaylihay laban sa punong ehekutibo.

Sa kaniyang complaint, inakusahan ni Lihaylihay ang presidente ng "betrayal of public trust" kaugnay sa nangyaring bentahan sa government-owned Pines Hotel sa Baguio City.

Ayon sa complainant, ibinenta umano ng gobyerno ang nasabing ari-arian sa halagang P70 million gayong ang market value umano ng lupa ay nagkakahalaga ng P1.7 billion.

Sa panig mismo ng Pangulong Aquino, sinabi nitong ayaw na niyang patulan ang aniya’y "non-sense" na kaso dahil abala umano ito sa mga mahahalagang bagay.

Ayon sa Pangulo, naibenta ang nasabing ari-arian noon pang 1997 kaya wala siyang kinalaman sa transaksyon.

“I think I do not want to give that the time of day, because that person has a penchant for filing cases against almost all government officials… I have so many concerns to address to be bothered by these non-sense,” ani Pangulong Aquino.