TACLOBAN CITY - Pumanaw na ang nakababatang kapatid ni dating first lady at Rep. Imelda Rumualdez-Marcos na nagsilbi ring dating ambassador ng Pilipinas sa Amerika at dating gobernador ng Leyte na si Benjamin "Kokoy" Romualdez.

Sa nakalap na impormasyon ng Bombo Radyo Tacloban, napag-alaman na namatay umano si Romualdez sa Makati Medical Center bandang alas-3:29 ng hapon kanina sa edad na 81.

Kung maaalala si Rumualdez ay naging ika-31 sa pinakamayaman na Filipino batay sa issue ng Forbes Magazine na merong naitalang US$70 million.

Si Kokoy na ama ni Rep. Ferdinand Martin Romualdez ng first district ng Leyte, ay naharap din sa patong patong na kaso pero inabswelto ng Supreme Court at Sandiganbayan.

Liban sa pagiging ambassador sa Amerika, itinalaga rin ito ng yumaong si dating Pangulong Ferdinand Marcos bilang envoy ng Pilipinas sa People’s Republic of China at sa Kingdom of Saudi Arabia.

Ayon sa ilang malapit kay Kokoy, dahil umano sa sakit na cancer ang ikinamatay nito.

Bago ito, ilang linggo na ring nasa intensive care unit ng ospital ang dating ambassador.

Sa ngayon hinihintay na ng kanyang mga kababayan ang labi ni Romualdez sa Leyte at posibleng magkaroon ng public viewing.